2010年7月17日星期六

Hea


「Hea」呢個字,現在解釋某人行為漫無目的、不由自主、無精神等等。據香港網絡大典指出,Hea的概念來自英文,一是hang around,意指遊蕩;二是lounge around,解釋為悠閒或懶洋洋消磨時間,此兩種說法有點穿鑿附會。而作家魏仲鸞著的《亞乜話齋閒話》,指舊時有「邐迆」 (音為「呢hea」,讀「呢」時音調偏向低沉) 一詞 (見蘇軾詩《巫山》中有句「瞿塘迆邐盡,巫峽崢嶸起」)。邐,有曲折連綿、通過、走過之意;迆,有斜行之意。「邐迆」便解作行在曲折之路時身軀歪歪斜斜,再引申為狼狽、不穩、混亂之意。後來,粵語指一件事情麻煩狼狽,令人手足無措,便叫「邐迆」。專欄作家彭志銘就引述魏仲鸞之考究,推敲現在「Hea」是從「邐迆」中拆出來。以上種種說法仍未有可靠之實證,不過粵語除了某些助語詞,多數有聲就有本字,相信日後可查明。

「呢hea」未必寫成「邐迆」,不過小弟相信「Hea」是從中拆出,此拆字法在粵語中頗為常見,有如「關照」一詞,後來簡化為「照」字,例如「照住細佬喎!」。據小弟記憶,早在七十年化已聽到「呢hea」一詞,其實是被人鬧,長輩口出「呢hea」,常見於兩事。

一) 下雨天時,買完東西回家,兩手一袋二袋,還要兼顧雨傘,身又濕透,踏入家門時,就被長輩鬧「你做咩咁呢hea 呀!唔好亂行呀你!企定!我過來幫你。」。何解要企定?因小弟做任何一個動作,身上及袋上的雨水皆隨處亂飛,整到間屋亂七八糟。
二) 多數新年時,一家大細去親戚家拜年,大家都整裝待發。媽媽回頭一望個衰仔,即是小弟,衫褲是換了,不過頭又未梳,鞋又未著,卻坐在梳化看電視,甚為優閒,此時就鬧「你份人做咩咁呢hea“o架”?人人都準備好出門口,你重係到睇電視,約咗人十點“o架”,快手啲啦!」。

當大家聽完兩件小事,想想背後意思,便明白小弟認為「Hea」出自「呢hea」之理。其實在粵語長片,間中都聽到「呢hea」一詞,大意都是狼狽、漫無目的及不由自主等等,再之前的廣東人如何使用及其意,就要老前輩指教。小弟學識淺薄,仍扮起語言專家來談粵語,記錄自身經驗,多少是抗拒中央對粵語的打壓。而最深刻是曾有一則娛樂新聞關於「Hea」字,令小弟心寒至今。事緣在早幾年,「Hea」字在香港大熱,人人談論起來,其中一位口出懶音的當紅少女偶像也湊熱鬧,高興表示新世代創作了「Hea」,還應盡快創造「Hea」的中文字。當時小弟迷惑之餘,又擔心有不學無術之流再來一場文革。不過小弟杞人憂天,這位少女偶像只會做賺錢的工作,練歌學戲都少做,其藝十年如一日,哪會上心做什麼新世代倉頡,最後當然不了了之,哈哈!

4 則留言:

  1. 波叔,好耐冇見喎... 我都係 Blogger 開咗個檔口啊...

    話時話,我都好睇唔慣中央打壓廣東話,文化冇多樣性,又何來精彩?依家啲北佬發明嘅網絡流行語就要我哋照跟,我哋嘅廣東文化就話出唔到大場面,有冇咁野蠻啊...?!

    回覆刪除
  2. to:Danny Lun
    中央從來恐怕多樣性,要唯我獨尊,不要咩嘢文化精彩,主席得閒講吓古文古詩,拋吓書包,香港人就會覺得有文化。香港人有時太善忘,小弟好怕廣東話會步上海話後塵。

    回覆刪除
  3. 邐迆音為「呢HEA」? 敢問出處。

    回覆刪除
    回覆
    1. 文中有講。最近有人提出「呢HEA」為四邑話,我也是四邑人,亦聽過家人講過「呢HEA」,但對此未能證實。

      刪除