2010年4月4日星期日

【鬼掹腳】洪金寶導演

導演:洪金寶
編劇:司徒卓漢
演員:張堅庭(飾王小明)、陳友(飾署長)、午馬(飾老爺)、劉天蘭 (飾王老師)、高麗虹、吳耀漢、元奎、樓南光、鍾發、火星、元華 (眾人飾警察)

農曆七月十四後,鬼門關大開,有說七月唔好出夜街,否則易做替死鬼。早前香港發生多宗遇溺意外,不期然想起電影《鬼掹腳》,直到現在不敢游夜水,拜本片所賜。印象中,八十年代中期自電影《生死線》後,香港拍成多部描述後生仔去郊野宿營的鬼片,稍有製作如倪淑君同成奎安主演《魔圖》(其實此片係九十年代版本的《生死線》) 及樓南光主演《甩皮鬼》等,當年有更多低成本製作,不過已忘戲名。荒島式鬼片有其特點,每當猛鬼發惡時,眾人困於荒蕪之地,無路可走,要等到天光,地理環境形成困獸之鬥,營造緊張氣氛。本片以西貢西灣 (即大浪西灣) 作背景,海陸空都可到此地,不過自己有船才可以隨時出入、搭車到附近再行幾公里、小型直升機停機坪只限緊急服務用,拍攝地點符合困獸鬥式鬼片。

本片鬼故發生在清朝,劉家村 (即西灣村) 村民發現姦情,淫婦偷走時跌落泥沼,姦夫被浸豬籠於西灣,化做水鬼,隱伏沙灘,自此西灣又稱猛鬼灣。恐怖片事先交代「隻」鬼的死因,通常引伸為該鬼特性,這可能係佢的強項或弱點,簡單而言,被火燒死,該鬼可能最擅長用火或最怕遇火,選擇邊樣會影響故事發展,而本片中的水鬼,則遇水更生猛。影片詳細講及水鬼,先講其生活,日間,陽光猛烈,像活在滾油中,感覺身燒火炙;夜晚,太陽下山,身在水中就冰寒透骨;下雨,更慘,如萬箭穿心。水鬼生活異常淒涼,觀眾感受其怨氣之重,睇到驚心動魄。水鬼常在水中拉人落水底,附上人身時全身大量出水及其汗味鹹 (因水鬼在海水中死亡) ,亦可以水作媒介上身。拍水鬼片順理成章向電影《大白鯊》借鏡,水鬼代鯊魚,一樣隱藏水中及扯人落水。有一幕幾正,水鬼藉雨天上岸到警局拉署長落水,拖行在沙灘一段時間,到海邊之際,午馬突然一聲喝令:「水鬼嚟o架!拖埋你落水!」,眾人眼白白見署長浸死,愛莫能助。用長鏡頭影着成個過程,緊張恐怖,亦突顯水鬼能力。

不得不提尾場,水鬼附上署長屍首,水警要明天才到,午馬用符鎮着水鬼,眾人去附近東灣警署求救,東灣警員不信有鬼撕走靈符,水鬼上元華身,眾人先用朱沙子彈逼退水鬼在警署之外,稍為鬆口氣,想不到水鬼經水渠返回警署,再上火星身,眾人打斷其手,以為無事,水鬼卻附上斷手,又大戰一回後,眾人用石油氣打爆水鬼。來回幾次人鬼大戰,不同花款,以為安枕無憂,水鬼又死唔斷氣,眾人又無路可退,由朱沙子彈玩到石油氣,層層進逼,精彩!緊張情節中滲入幽默,火星未被上身前,午馬懷疑有人被水鬼上身,建議眾人圍圈,互舐別人的手,看看誰人身懷鹹汗水,當中只有一人知道,似玩估領袖遊戲,緊張兼好笑!本片將搞笑和驚嚇輪流交替,掌握到節奏同氣氛,玩得出色,當你緊張一輪,編劇便寫笑話暖和氣氛,使觀察鬆懈之際,出奇不意作出新一回驚嚇場面。這種睇到又驚叫又惹笑的鬼片,八、九十年代拍了不少,可說是港產片中經典系列。

結尾有幕細緻描繪水鬼附體之形態,水鬼附上火星的斷手繼續殺人,火星便回復人樣,斷手返回火星屍體,火星又變回水鬼樣貌,背後帶出少有的鬼魂附物觀念。睇鬼片常見鬼上人身後,當人頭與身軀分離,兩者仍繼續思想及活動,暗示鬼魂控制腦袋與心臟使頭身仍運作,可謂魔力高強,本片女鬼附上劉天蘭後,就有玩此橋,水鬼與此不同,它限制附上斷掌中,不可同時控制其餘身軀,像寄居人體其中一處,無所謂控制心腦,生命力更強,竄擾性大。將猛鬼的背景寫得詳細,好多時比在造型上花心思更恐怖。

2 則留言:

  1. 洪金寶另一部監製電影"神探父子兵",因在嘉樂院線上映檔期問題閙翻後,其後作品便改由新寶院線上映,"鬼掹腳"便是第一部由新寶發行(最初在海報印上嘉禾貢獻 最佳影片及寶禾影業有限公司攝製字眼,後改為寶祥影業有限公司出品)
    很可惜,"鬼"及"神"兩片至今仍未在港推出VCD及DVD,呢兩套電影真係八十年代經典作品

    回覆刪除
  2. to:steve
    其實洪金寶脫離嘉禾後,就開始下滑。另,《鬼掹腳》有出過錄影帶,我諗應該都有碟,不過現在買唔翻。

    回覆刪除